軟滑豬腸粉食譜

身在美國,平日在香港可以吃到的美味小食,現在必需動腦筋和親自下廚才能吃到。不知何年何月才返港,唯有自行鑽研香港的特色地道小食,讓小公主們足不出戶,舌嚐千萬里。今次,媽媽還自製了蔴醬和甜豉油,加了炒香的芝蔴和海鮮醬,超地道的港式風味,一解我思港之情。

DSC_9996

軟滑豬腸粉食譜
English Version Recipe, Click here.

材料:
粘米粉                    1.25 杯
水                           2.25 杯
鹽                          1/8 茶匙
菜油                       1.5 湯匙(另少許防黏用)
玉米糖膠/澄麵     1/4 茶匙
芝蔴                       2 湯匙

醬汁:
蔴醬    適量(食譜按此
海鮮醬    適量
甜豉油    適量(食譜按此

廚具:
Le Creuset 32cm Buffet Casserole (5-quart)
8 x 8 吋正方形不銹鋼盤
矽膠刮
矽膠掃

做法:
1. 用少量水開稀玉米糖膠或澄麵,除芝麻外,加入所有材料混和,過篩2次。
2. 在金屬盤內塗一層薄油,加入約1.5湯匙粉漿,左右搖勻至僅僅蓋滿盤底,大火蒸2分鐘。
3. 取出後,用矽膠刮輕刮4邊,捲成腸粉狀。
4. 重覆步驟2﹣3,直至所有粉漿用完。隨個人喜好加入醬汁和芝蔴即可食用。

小貼士:
1. 準備另一個蒸鍋,將捲好的腸粉放入保持熱度。
2. 將捲好的腸粉放進大碟中,全碟蒸2﹣3分鐘,整碟翻熱較每捲一條放入蒸鍋更方便。
3. 喜歡芝麻香口一點,可以先在平底鑊乾炒數分鐘至金黄色。

English Version Recipe, Click here.

Like me on Facebook:         https://www.facebook.com/littlepandamommypage
Follow me on Twitter:         @thepandamommy
Follow me on Pinterest:      http://pinterest.com/thepandamommy/

 

11 thoughts on “軟滑豬腸粉食譜

  1. Ceci08

    係喎, 都無聽過你會計劃返香港探親, 兩個小朋友未返過去? 如果老公放唔到假都可以考慮自己帶兩個返. 祖父母應該好想見見佢哋.

    Reply
    1. Little Panda Mommy

      婆婆公公都好想見她們,我都好希望她們可以見面,仲要返鄉下探曾祖父母.但她們太好動,所以連住紐約的太爺都唔敢飛去探望,唔想她們玩足3個鐘i pad.但無乜可能要她們訓足咁耐.

      我呢度返去至少轉一次機,起碼要在機場和機中逗留26小時,轉機一係趕到死,由機場頭跑到機場尾,一係要等大半日,她們咁細要等又要坐咁耐,一定唔夠耐性,講真,大人都悶死.

      如果她們訓著左要轉機,我亦無可能一個抱兩個,仲要攞行李.小朋友熟睡點叫都唔醒,如果叫得醒都會狂喊,兩公婆一齊返去都好辛苦,一個人實在無本事.如果遇著她們的生長期,易怒易累肯定好大鑊,仲要騷擾到其他人,所以起碼要等多1年,二公主都定性d,可以坐耐少少先會考慮.

      Reply
      1. Mr and Mrs Leung's Kitchen

        咁即係你的香港家人從未見過你兩個女?
        traveling呢啲野事在人為遮, 你未試過點知唔得? 細路適應力好強, 可以仲易過大人呢
        我尋日就同一家美國華僑食飯, 個仔都30歲, 先第一次黎香港, 第一次見公公婆婆, 真係好匪夷所思!
        你應該趁兩個女細, 帶佢地番多啲香港/亞洲, 俾佢地知世界另一面係點
        同埋認識自己的家人和文化呀

        Reply
        1. Little Panda Mommy

          我細妹見過她們,父母同其他親戚都係網上見,每個星期都會傾偈同見到。
          我有太多朋友帶年幼子女返港後,直說難為自己一家大小,又害一機人辛苦足一日,所以如果唔係必要,5歲前都唔會再返。
          小公主坐一陣就無乜問題,但一定唔可能坐定定坐足一日都唔郁,但我唔會俾她們在機上走來走去,易生意外,玩起上黎得意忘形,一定唔會坐返低。
          家庭醫生告訴我,想當年帶年幼子女飛去第二個州探親都要俾防敏感藥他們食,等他們上機訓覺。我唔想餵阿女食藥上機,亦無可能要她們訓足廿幾個鐘。我同老公上次返香港,又延誤又跑到甩肺都差D追唔切上機,開機前叫晒名,我地先剛落機,一直跑到櫃位差D上唔到機,如果故事重演,帶住兩個加埋70幾80磅的腳短小孩跑機場,一定滯留。如果要預長時間在轉機的一程,好多時都要等第二日,同她們在機場訓又唔係,又無理由出機場住酒店,第二日又提早2個鐘重新入閘,肯定發神經都似。
          我地商量左好耐,決定最早5歲先帶她們遠行是明智之舉。

          Reply
  2. Vicky

    好味道!我細細個見爸爸媽媽在家整,佢地鍾意加少少蝦米同蔥花,都好味!我有機會都玩玩,仲好想食魚肉燒賣同煎薄餐呢!:)

    Reply
      1. Vicky

        小公主們真幸福,媽媽識煮同有心機煮唔係必然 。。。更何況美國真係難搵齊咁多香港特色小食呢!自己煮係麻煩啲不過好過冇,有家人欣賞就更加滿足 🙂

        Reply
  3. Vicky

    其實我都好明白你既苦衷,我自己飛得多見有啲夫婦帶住個手抱B,或剛剛行得既都要喺飛機又呵又起身行來行去,喊起上黎全機人望住你好唔好意思。我都怕第時要小朋友等幾年先返香港,我自己可能仲心急 :p 其實你住邊個州? 我喺Chicago飛好彩都有十四個鐘鬆啲既直航。搭過直航真係唔想再轉機,不過當然要遇到good deal先有得揀啦!

    Reply
    1. Little Panda Mommy

      你就好啦!有直航飛14個鐘就搞掂,好彩的話,小朋友可能會訓大半程機,又唔怕趕轉機。
      我住Houston無直航,至少轉一次,好大機會要轉2次,最快要22小時,通常都26﹣32小時,仲未計要提早去機場和抵埗後等行李和過關等等,快則一日,慢可以一日半,大吉利是遇到延誤就真係大鑊(而我們通常好黑仔會遇上至少3小時以上的延誤),所以搭飛機真係可免則免,要等她們大個少少先敢諗。
      小朋友喊起上黎,明事理的人會明白和同情你,但唔會幫到你。唔明白的人但好人的,會望兩眼就算。唔明白又惡死的人,分分鐘白鴿眼仲要加埋勁難聽的說話。我有朋友在香港,行街唔帶車仔又有人話細路咁細行得慢,阻住條路。用車仔又話她小朋友唔係BB,唔知做乜咁大個人都仲要用車,阻住晒。
      未有小朋友前,好多人都唔明點解要小朋友停喊咁難,叫她收聲唔好喊咪得囉,同埋點解D細路成日走來走去咁曳,係咪無家教。其實真係要做左人阿媽,全天候由BB開始照顧小朋友的,先會明白和體諒到小孩不是機械人,唔可以襟個制就要她做乜都得,要教育,要引導,要指正,要呵護又要照顧,仲要顧埋會唔會影響到一班唔識的街外人,唔會阻住或騷擾到其他人,才敢帶她們出街。每次出街都好似打扙一樣,真係要有心理和身理準備。
      我完全明白點解咁多朋友一定要請工人,好多時無工人唔敢同自己仔女單獨出街,因為她們失控時至少多雙手。

      Reply
      1. Vicky

        我想像得到呀!以前工作關係帶過P.1,P.2出街,同湊仔冇乜分別。經常俾小朋友包圍都嘈到暈。不過佢地生性又有好多樂趣。你地真係飛好長機喎。其實時間過得好快,女女過多幾年返香港印象仲深 🙂

        Reply

Leave a Reply

Your email address will not be published. Required fields are marked *