早幾日整親自己隻眼,唔舒服左一個朝早,好彩下午已經無事.令我諗起早幾年的某日,老豆同我地行街前隻眼又紅又痛,行街途中越來越痛,仲紅到好似血咁,於是要去廣華醫院睇急症.有史以來最快的一次,半個鐘左右就入到急症室.原來佢整損左個眼球,於是要返屋企休息,醫生話遲些少才求醫,盲都有份………好彩無事.

昨晚的夢,阿媽打電話給我,話同老豆睇完醫生,隻眼仲差過之前,睇野好糢糊,點算好.我叫佢地即刻去睇醫生,但要睇另一個,因為之前果個應該唔得,所以用完眼藥水會仲衰d.但老豆又唔想去,於是要阿媽迫老豆去,唔係我怕佢會盲.於是他們去到醫院又打俾我……….突然醒左………….

昨晚的其中一個夢,竟然係某團體或學校活動後,很多指甲油不見了,最後有些同學將不屬於自己的交出來,但我仍然不見了很多顏色的甲油,只找回失去了的粉紅色………耳環又不見了很多隻……….仲要俾許sir催….又係夢到見到佢……….次次都難為我.所以每次在夢裏面我都會鬥到底,唔俾機會佢睇少同蝦我,要激死佢為止.你睇少我咩,我係要做到好好,睇你仲可以點難為我.

昨天才開開心心,因為無晒experimental,點知昨晚就發夢做做下url,突然彈左一個兩個….的experimental tasks………….然後係個夢到好唔想做,想逃避.點會咁架?我諗我真係做到怕,勁唔想佢地返黎.更神奇的是,上個月不斷有暗瘡問題,最少果日都有一粒.昨日突然發現,皮膚好返番,乜粒粒都無.我估又係好似做記者果陣咁,太大壓力搞到生暗瘡.一唔駛做,就乜事都無.

我的特點在於以為自己是隻猫.

捱左個幾月的experimental,終於可以休息一下.只做回最基本的url,輕鬆愉快.心情大好.做gym都覺得輕快左,連奶奶都問我做乜今日咁多精力,在gym到跳來跳去.心情好,心頭大石放下了,跳都跳得高d.

加上bonus program又加多兩個禮拜,又多d錢.哈哈.唔開心就奇lu.

早幾天去行街街,又無啦啦發神經,好小事又化大,發老公脾氣.(雖然較以前對前男友,已經收歛左九成,但仍覺得可以做得更好)一路發神經,一路好嬲自己,做乜開開心心去行街,無端端又控制唔到自己的情緒.到夜晚返到屋企,訓覺之前,我又借題發揮,再發神經同勁喊(都唔知點解會喊得咁厲害,可能太忟自己控制唔到情緒啦)

老公好講道理,次次我發神經又唔睬佢又唔理佢,他就算好忟憎都仲會安慰我,嘗試令我笑番.每次我一喊,佢就會發晒矛,唔知點算,擔心都想喊咁,事後仲會好唔開心,以為他自己搞到我唔開心(令到發緊脾氣的我好鬼心痛,又好憎自己做乜發癲,無奈真係控制唔到)見到每次因為控制唔到自己飄忽的情緒,令大家都唔開心,真係好憎自已,好彩一直有共識,一個發癲的話,另一個一定要冷靜,而且大家都係好愛對方,唔係吵大鑊都有份.

每次唔肯睬佢,佢都會嘗試將我抱入懷中,雖然好多時都失敗,我發癲的時候真係好難移動,即使老公都不能移我半分.但真係好感動,佢會屢敗屢戰,直至可以抱著我為止,然後告訴我有任何事都總會有他在身邊,甚麼事都要和他分享,讓他可以幫助我.又求我不要將他拒諸門外,因為他希望進入我的心扉,與我一齊度過所有難關.(每次聽到都覺得好心痛,因為我太清楚這種感受,多得前度所賜;但又要多謝他,如果唔係我唔會知道,十問九唔應可以有幾難受)

感謝主,每次發癲之後,都令我同老公的感情更深,更清楚大家有多愛對方.更好彩的是,即使我表達的方式錯誤,但有他這樣明白事理,好耐性的老公原諒我.很喜歡這種強烈的愛,鐘意可以真正感受得到的愛,你真係第一個令我有這種感覺的人,所以你嬴是有原因的.當然,我都有我嬴的原因啦!哈哈.

點解仲有experimental?幾時先做得完呀?一半的query都無search engines可以搵到,又唔make sense,想點呀?雖然下兩個禮拜又有bonus program,但今次有d擔心,因為我做experimental太慢,有時可以一個鐘都做唔到一個task,快的時候又可以5分鐘兩個tasks,但係慢多過快…………唔想咁樣,可以點樣呀?

照email睇黎,experimental好似會變成長久task,救命呀!!!!!!!!!!!!!!!!!!!!!!!!!!

從前嬌縱任性,因為身邊每個人對我都很好,從來也沒有學懂珍惜.直至公公離開,家人朋友開始有病,才發現可以一起吃飯,安靜地看看電視,其實也是一種幸福.

在美國工作,做到倦做到病,醫生也不敢看,懶在床上想起從前在港,母親處處照顧,每餐特別地為我煮粥,但每次都沒有胃口,不想吃.當時想吃也得死死地下床,走進廚房自己煮自己吃.才知道有家人照顧是多麼的幸福,平時卻只怪她管得嚴,問得多,卻沒有關心過她.真慚愧.

現在病了,老公和老爺奶奶都處處照顧,也是呵護備至,又是一種幸福.現在沒有母親煮的粥,卻有老公煮給我吃,且常常在半夜醒來看我怎麼樣.見到他關愛的模樣,我很感動,知道今次選對人,嫁得遠也是值得的.

我是個怪人,樂觀卻又悲觀.只有老公才可以應付我.每次生病,我都會小事化大,但有事的時候我卻會大事化無.不過亦因為這種神經質,令我珍惜可以和他每天一起的日子.意外天天發生,生命長短真的只有天知道.我感激主每天給我健全的身心,可以感受被愛和去愛,可以隨心所欲.

要開心,要幸福.不等於一定要有戀人,有家人,有朋友(當然有就更好),最重要是自愛,要珍惜自身擁有的東西.有能力去幫助人,每天早上起來能看見東西,可以自由地活動,可以有自己的思想,可以吃喜歡的食物,全都是幸福的事.只在乎你怎樣為幸福下定義.

失戀,失業,失學,甚至失去至親,的確令人心灰意冷,覺得世界黑暗.但想想那些從未試過戀愛,身體殘障不能走動,貧窮鄉村的兒童,出世就沒有親人的孤兒.你的失意失落,相比之下算不上甚麼.不是嗎?起碼你曾經擁有,他們卻連機會也沒有.

要幸福,就要學懂珍惜所有.知足真的會常樂.